Kthehen nga Franca pasi iu refuzua azili, zv.ministrja: Operacionet e riatdhesimit do të jenë më të shpeshta - Ministria e Brendshme
Postuar më: 12/06/2019

Kthehen nga Franca pasi iu refuzua azili, zv.ministrja: Operacionet e riatdhesimit do të jenë më të shpeshta

VIDEO

Mesditën e sotme në aeroportin “Nënë Tereza” Rinas, janë riatdhesuar 50 shtetas shqiptarë me avion të posaçëm, të nisur nga aeroporti i Metz, Francë. Nga Policia shqiptare dhe ajo franceze u morën të gjitha masat që ky operacion të zhvillohej sa më mirë.

Operacioni i sotëm i riatdhesimit, i cili u zhvillua në bashkëpunim me Policinë franceze, kishte një veçanti pasi kthehen familjarë me të mitur dhe të gjithë të riatdhesuarit janë azilkërkues në Francë, të cilëve iu është refuzuar kërkesa për qëndrim.

Zv/ministria e Brendshme Rovena Voda ka theksuar se çdo përpjekje për kërkim azili është e kotë, sepse Shqipëria është në listën e vendeve të sigurta, ndaj ajo ka bërë thirrje për të mos ndërmarrë asnjë hap në këtë drejtim, por të kërkojnë rrugë ligjore për t’u punësuar në vendet e BE-së.

“Operacionet me Francën do të vijojnë, kjo edhe në kuadër të vizitës së Ministrit të Brendshëm dhe bisedës me Ministrin e Brendshëm francez, ku u dakordësua që riatdhesimet do të ishin më të shpeshta. Ndaj u lutem gjithë shqiptarëve, është e drejta e tyre të lëvizin në zonën Shengen, të migrojnë, por të zgjedhin rrugën e sigurt”, u shpreh Voda përmes medias.

Drejtori i Departamentit për Kufirin dhe Migracionin në Policinë e Shtetit Eduart Merkaj ka theksuar se gjatë këtij 5 – mujori, fluturimet e riatdhesimit janë rritur jo vetëm me Francën, por edhe me shumë vende të tjera të BE-së, duke forcuar më tej bashkëpunimin, në drejtim të shkëmbimit të informacionit më të detajuar dhe në kohë reale.

Gjithashtu Polica Kufitare ka forcuar masat për parandalimin e kalimit të kufirit, me qëllim kërkimin e azilit në vendet e BE-së.